Откривај ги убавините во Охрид, Струга и Преспа

Активирана веб платформата и мобилната апликација со поддршка од ПЛРК

Потпроектот „Охрид & Преспа То Гоу“ спроведен од страна на Здружението „Коцка“ – Скопје, наменет за поддршка и унапредување на туризмот во регионите на Охрид, Струга и Преспа, создава нова можност да се промовира туристичкиот потенцијал и да се зголеми економската активност на дестинацијата.

Развиената платформа lakes.mk заедно со мобилната апликација наменета за корисниците на двата оперативни системи, претставува едноставен туристички водич кој треба да ги поттикне туристите да ја посетуваат и истражуваат најпознатата дестинација во нашата држава.

Веб платформата, како дел од резултатите од проектот, има прегледна содржина и е оптимизирана за користење на сите видови уреди.
Платформата содржи база на податоци за постоечката туристичка понуда и вклучува природни убавини, гастрономска разновидност, културни богатства, сместувачки капацитети и останати привлечни содржини.

При создавањето на базата на податоци, покрај контактите со институционалните субјекти, комуницирани се и чинителите во туристичкиот сектор, пришто сите субјекти се поканети да станат дел од платформата, во зависност од природата на нивната туристичка понуда.

“We lake you” – Промотивна кампања

Промотивната кампања, „We lake you“ е реализирана како дел од проектот, преку социјални медиуми, портали и преку директен маркетинг.
Целна група на кампањата, покрај македонските туристи, се и туристите од соседните земји, претежно од Србија.

Камњата има за цел да ги привлече туристите да ја посетат дестинацијата, истакнувајќи ги особеностите на Охрид, Струга и Преспа од аспект на природното и културното богатство, како и нивната интегрирана туристичка понуда.

Повеќе информации: We lake you

Проектот за локална и регионална конкурентност е финансиран од Европската Унија и Владата на Република Северна Македонија. Проектот се администрира преку Светска Банка, а се спроведува преку Кабинет на Заменик Претседателот на Владата задолжени за економски прашања, координација со економските ресори и инвестиции.